რა საფრთხეებს შეიცავს არალიცენზირებული, გატეხილი ან პირატული პროგრამული უზრუნველყოფა მომხმარებლისთვის
დღეს მეოთხე ინდუსტრიულ რევოლუციაში ვცხოვრობთ, რაც იმას გულისხმობს, რომ საქმიანობის გასამარტივებლად, აუცილებლად ტექნოლოგიების გამოყენება გვჭირდება. ჩვენ არა მხოლოდ სამსახურებრივ მოვალეობებს ვასრულებთ სხვადასხვა პროგრამის გამოყენებით, არამედ დღის დარჩენილ დროსაც სხვა აპლიკაციების გამოყენებით, სხვების სურათებს ვათვალიერებთ, ჩვენს საყვარელ ადამიანებს ვუკავშირდებით და ვცდილობთ, ტექნოლოგიები განტვირთვის საშუალებადაც ვაქციოთ. თითოეულ მოწყობილობას, რომელსაც თქვენ ფლობთ, საკუთარი პროგრამული უზრუნველყოფა გააჩნია, რომელიც გულისხმობს - პროგრამების, ინსტრუქციებისა და მონაცემების კრებულს, რაც საშუალებას აძლევს კომპიუტერს ან ელექტრონულ მოწყობილობას, კონკრეტული ამოცანები ან ფუნქციები შეასრულოს. ეს ციფრული ხელსაწყოების კომპლექტს გავს, რომელიც მოწყობილობას აიძულებს, იმუშაოს ისე, როგორც გსურთ.
ხშირად, შესაძლოა, გასართობი თუ მუშაობისთვის აუცილებელი მოწყობილობა ჩვენთვის და ჩვენივე პირადი ინფორმაციისთვის საფრთხის მომტანი აღმოჩნდეს. ყველამ როდი ვიცით რა საფრთხეებს შეიცავს არალიცენზირებული, გატეხილი ან პირატული გზით დაყენებული პროგრამული უზრუნველყოფა მომხმარებლისთვის.
ყოველდღიურად, არალიცენზირებული პროგრამული უზრუნველყოფის გამოყენებისას ადამიანები დიდი საფრთხის წინაშე დგებიან, ეს შეიძლება იყოს: საკუთარ პირად ინფორმაციაზე წვდომის შეზღუდვა, პირადი ინფორმაციის სხვის მიერ დაპატრონება... მაგალითად: პირადი მიმოწერები, მეილები, დრაივზე ატვირთული ფოტოები, საბანკო ანგარიშები და სხვა სხვის ხელში შეიძლება აღმოჩნდეს. არსებობს დიდი შანსი, რომ თქვენი კომპიუტერი დავირუსდეს, ან „ვინმემ“ კრიპტოვალუტა გამოიმუშავოს. ეს ვრცელი სიის მცირე ჩამონათვალია, მაგრამ სიტუაციას კიდევ უფრო სახიფათოს ხდის ის ფაქტი, რომ ყველაფერი შეიძლება ისე ხდებოდეს, რომ ვერც კი შეამჩნიოთ.
მაშინ იბადება კითხვა: მსგავსი საფრთხეებისგან ადამიანმა როგორ უნდა დაიცვას თავი?
საკითხი მარტივია და გამოსავალი ლიცენზირებული პროგრამული უზრუნველყოფის დაყენებაში მდგომარეობს, მაგრამ ხშირად ჩვენ ვერ ვხვდებით, რომ ჩვენივე უსაფრთხოება გარკვეულ თანხებთან არის დაკავშირებული.
როდესაც პროგრამულ უზრუნველყოფას ლეგალურად ყიდულობთ, ჩვეულებრივ, იღებთ ლიცენზიას, რომელიც გაძლევთ უფლებას, გამოიყენოთ პროგრამული უზრუნველყოფა გარკვეული პირობების შესაბამისად. ასეთი ლიცენზია გავს იურიდიულ შეთანხმებას თქვენსა და პროგრამული უზრუნველყოფის კომპანიას შორის, რომელიც მისი გამოყენების უფლებას გაძლევთ. სანაცვლოდ, თქვენ ეთანხმებით, დაიცვათ პროგრამული უზრუნველყოფის კომპანიის მიერ დადგენილი წესები. თუმცა, არალიცენზირებული, გატეხილი ან პირატული პროგრამული უზრუნველყოფის დაყენება და გამოიყენება საჭირო ნებართვის ან ლიცენზიის მიღების გარეშე ხდება. მაშასადამე, ამ შემთხვევაში, თქვენ არ ფლობთ არანაირ იურიდიულ ბერკეტს, რომ თქვენი ინფორმაცია საგულდაგულოდ იქნება დაცული. ეს ხშირად გულისხმობს პროგრამული უზრუნველყოფის ჩამოტვირთვას ან კოპირებას არაოფიციალური ან არაავტორიზებული წყაროებიდან.
და მაინც, რატომ უღირთ ადამიანებს გადმოწერონ არალიცენზირებული პროგრამული უზრუნველყოფა, თუ იციან, რომ ის საფრთხის მომტანია?!
ხშირად, ამაზე პასუხი - თანხის დაზოგვაა. ლიცენზირებული პროგრამული უზრუნველყოფის დაყენება, რაღა თქმა უნდა, თანხებთან არის დაკავშირებული. იმისათვის, რომ „ზედმეტი“ ხარჯი ადამიანმა თავიდან აირიდოს, გატეხილ, არალიცენზირებულ და პირატულ გზას ირჩევს.
რატომ აქვს საზოგადოებას მოლოდინი, რომ ლიცენზირებული პროგრამული უზრუნველყოფა უფასო უნდა იყოს?!
იმისათვის რომ შეიქმნას, დაიხვეწოს და ბევრ მომხმარებელს საკმაოდ კარგად მოემსახუროს სხვადასხვა პროგრამული უზრუნველყოფა დიდი ადამიანური რესურსია საჭირო. 2022 წლის მონაცემების თანახმად Microsoft-ში 221,000 ადამიანია დასაქმებული. სწორედ ისინი უზრუნველყოფენ ჩვენს ლეპტოპებში პროგრამების გამართულ ფუნქციონირებას და არა მხოლოდ, ჩვენი პირადი მონაცემების უსაფრთხოებასაც. ყველას შრომა დაფასებული უნდა იყოს ანაზღაურებით, მაგრამ საზოგადოებას მიაჩნია, რომ ლიცენზირებული პროგრამული უზრუნველყოფა მათ უფასოდ ეკუთვნით. საზოგადოების ნაწილი ფიქრობს, რომ რადგან ლეპტოპსა და კომპიუტერს ყიდულობს, ამ საფასურშივე უნდა შედიოდეს ლიცენზირებული პროგრამული უზრუნველყოფა - მაგრამ უნდა აღვნიშნოთ, რომ პროგრამული უზრუნველყოფა და ლეპტოპი ერთმანეთისგან განსხვავებული „პროდუქტებია“, თუმცა ისინი ერთმანეთის გარეშე ვერ ასრულებენ ჩვენს მიერ მითითებულ ფუნქციებს. ერთ-ერთი ფაქტორი, თუ რატომაც არ ვაფასებთ ლიცენზირებულ პროგრამულ უზრუნველყოფას, ან იმ ადამიანებს, რომლებიც ზრუნავენ ჩვენთვის კომფორტი და უსაფრთხოება შექმნან, არის მოლოდინები, რომ „სხვა მიზერულ ფასად დაგვიყენებს“ ლიცენზირებულ ვერსიას. ვინც არ ფლობს ინფორმაციას თუ რატომ არის ასეთი მნიშვნელოვანი ჩვენი პირადი ინფორმაციის დაცვა, რა საფრთხეებთანაა დაკავშირებული გატეხილი, პირატულად დაყენებული პროგრამული უზრუნველყოფა, ხდებიან ისეთი ადამიანების პოტენციური კლიენტები, რომლებიც ირწმუნებიან, რომ შესაძლებელია, მიზერული თანხის სანაცვლოდ ჩაუწერონ ლიცენზირებული ვერსია.
რა თქმა უნდა, ეს არაკეთილსინდისიერი საქციელია და ამ დაუდევარმა ქმედებამ, შესაძლოა, ადამიანი არასასურველ შედეგამდე მიიყვანოს.
განვიხილოთ თუ რატომ არის აუცილებელი ლიცენზირებული პროგრამული უზრუნველყოფა და არ ენდოთ სხვას - ვინც დაგარწმუნებთ, რომ პირატული ვერსია და ლიცენზირებული ერთმანეთისგან არ განსხვავდება.
ლიცენზირებული პროგრამული უზრუნველყოფა ნიშნავს, რომ თქვენ პროგრამის შემქმნელისგან გაქვთ მისი გამოყენების ნებართვა, ლიცენზირებული პროგრამული უზრუნველყოფის ინსტალაციით, თქვენ პატივს სცემთ საავტორო უფლებების კანონებს და თავს არიდებთ ნებისმიერ სამართლებრივ საკითხს ან ჯარიმას, რომელიც შეიძლება წარმოიშვას პირატული ან არაავტორიზებული პროგრამული უზრუნველყოფის გამოყენებით.
ლიცენზირებული პროგრამული უზრუნველყოფა, როგორც წესი, შემუშავებულია პროფესიონალების მიერ, რომლებიც იცავენ ხარისხის მკაცრ სტანდარტებს. ის გადის მკაცრ ტესტირებას, რათა დარწმუნდნენ, რომ სწორად ფუნქციონირებს და მოთხოვნას აკმაყოფილებს. ეს ნიშნავს, რომ თქვენ შეგიძლიათ ელოდოთ საიმედოობის და სტაბილურობის უფრო მაღალ დონეს არალიცენზირებულ ან პირატულ პროგრამულ უზრუნველყოფასთან შედარებით, რომელიც შეიძლება შეიცავდეს ფარულ და მავნე მიზნებს.
ასევე აღსანიშნავია, რომ პროგრამული უზრუნველყოფა დროთა განმავლობაში ვითარდება და ხშირად, ახალი ფუნქციები ინერგება მუშაობის გასაუმჯობესებლად და ცვალებადი მოთხოვნების დასაკმაყოფილებლად. ლიცენზირებული პროგრამული უზრუნველყოფა გაძლევთ შესაძლებლობას, ეს განახლებები მიიღოთ და უახლესი ფუნქციებით ისარგებლოთ, რომლებიც კომპიუტერისა და თქვენი მონაცემების უსაფრთხოებას უზრუნველყოფენ.
მაშასადამე, ლიცენზირებული პროგრამული უზრუნველყოფის ინსტალაცია გადამწყვეტია იურიდიული შესაბამისობის, უსაფრთხოების, საიმედოობის, ტექნიკური მხარდაჭერაზე წვდომისა და მომავალი განახლებების მიღების შესაძლებლობისთვის. ის უზრუნველყოფს თქვენს სიმშვიდეს, იცავს თქვენს კომპიუტერს, პირად მონაცემებს და ამავე დროს, თქვენ მაღალი ხარისხის, ავტორიზებულ პროდუქტს იყენებთ, რომელიც ინდუსტრიის სტანდარტებს აკმაყოფილებს.
Laptops.ge გთავაზობთ ამერიკიდან გამოგზავნილ განახლებულ ლეპტოპებს, რომლებშიც ჩატვირთულია ლიცენზირებული პროგრამული უზრუნველყოფა. ჩვენ ვზრუნავთ მომხმარებლებზე და მათ უსაფრთხოებაზე, სწორედ ამიტომ ჩვენთან შეძენილ თითქმის ყველა განახლებულ ამერიკულ ლეპტოპს მოჰყვება ლიცენზირებული სისტემა.
