თანამედროვე ლეპტოპის ერთ-ერთი ყველაზე გამორჩეული სიკეთე მისი პორტაბელურობა და ავტონომიურად მუშაობის შესაძლებლობაა. თუმცა, ხშირ შემთხვევაში ამ უპირატესობით სარგებლობის ბედნიერება ძალიან მალე მთავრდება — ელემენტი შეძენიდან მალევე სუსტდება ან ფუჭდება და იძულებულები ვართ, დენის წყაროსთან მუდმივად შეერთებული ლეპტოპით ვიმუშაოთ (რაც უკვე დესკტოპს უფრო ჰგავს).
თუმცა, სანამ ეს დღე დადგება, ნამდვილად შეგვიძლია ჩვენს ლეპტოპს ისე სწორად მოვუაროთ, რომ მისი აკუმულატორის მუშაობის ხანგრძლივობა (ციკლების რაოდენობა) მაქსიმალურად გავზარდოთ და დიდხანს შევინარჩუნოთ ქარხნული ტევადობა. ამ სტატიაში გაგიზიარებთ 7 მნიშვნელოვან, პრაქტიკულ რჩევას ნოუთბუქის ელემენტის სიცოცხლის გასახანგრძლივებლად.
1. იმუშავეთ დენზე, მაგრამ არა 100% ყოველთვის
სახლში ყოფნისას სრულიად დასაშვებია ლეპტოპი გქონდეთ მუდმივად დენზე შეერთებული (თანამედროვე ლეპტოპები 100%-ზე ასვლისას ელემენტის ნაცვლად პირდაპირ დენს მოიხმარენ), თუმცა ნუ გადააჭარბებთ ამ პრაქტიკას. აუცილებელია ხანდახან ავტონომიური რეჟიმითაც გამოიყენოთ.
როცა ელემენტი დიდხანს არ მუშაობს (არ იცლება და იტენება), შიგნით არსებული ქიმიური ნივთიერებები „ძველდება" და კარგავს ელასტიურობას. ამიტომ გირჩევთ, კვირაში მინიმუმ ერთხელ (მაგალითად 5 დღეში ერთხელ) ლეპტოპი გამორთოთ დენიდან, დახარჯოთ ელემენტი დაახლოებით 20-30%-მდე და შემდეგ ისევ სრულად დატენოთ.
2. ნუ ჩაიყვანთ 20%-ზე ნაკლებ ნიშნულზე (ღრმა განმუხტვა)
იმისთვის, რომ ლითიუმ-იონური აკუმულატორის სიცოცხლე გაახანგრძლივოთ, კატეგორიულად მოერიდეთ მის 0%-მდე დაჯდომას. ეცადეთ არ ჩამოსცდეთ 20%-ს. როდესაც ლეპტოპი ავტონომიურად მუშაობს და ელემენტი 20-10%-ს უახლოვდება, შეაერთეთ ის დამტენზე. თუ დამტენი ახლოს არ გაქვთ, სჯობს უბრალოდ გამორთოთ ლეპტოპი.
- ელემენტის 20%-ზე ნაკლები რესურსის დროს კომპიუტერი იძულებით გადადის ეკონომიის რეჟიმზე. შესაბამისად, სისტემა ამცირებს პროცესორის და ეკრანის სიმძლავრეს, რაც თქვენს მუშაობაში ხელს შეგიშლით (ყველაფერი შენელდება).
- თუ ელემენტი ბოლომდე (0%-ზე) დაჯდა და ლეპტოპი რამდენიმე დღე არ ჩაგირთავთ (არ დაგიტენიათ), ის შეიძლება ღრმა განმუხტვაში გადავიდეს. ამ დროს შეიძლება საერთოდ აღარც ჩაირთოს და მოგიწიოთ ახალი ელემენტის შეძენა.
ყურადღება „მოხუცებულ" ელემენტებზე:
როდესაც ელემენტი უკვე აღარ არის ახალი (და აქვს დაახლოებით 200+ დატენვის ციკლი), პროცენტული ჩვენებები შეიძლება ზუსტად არ შეესაბამებოდეს რეალობას. მაგალითად, შეიძლება 15%-ზე უცებ გაითიშოს. ამიტომ ყოველთვის თადარიგი დაიჭირეთ და ნუ მიიყვანთ ქვედა ზღვრამდე.
3. ლეპტოპი გედოთ სწორ, მყარ ზედაპირზე
ეს კრიტიკულად აუცილებელია იმისთვის, რომ მოხდეს ჰაერის სწორი ცირკულაცია და ლეპტოპი არ გადახურდეს. როგორც უკიდურესად მაღალი, ისე დაბალი ტემპერატურა ნოუთბუქის ელემენტის (და მთლიანი სისტემის) ყველაზე დიდი მტერია.
ნუ დადებთ ჩართულ ლეპტოპს პირდაპირ დივანზე, საწოლზე, პლედზე, ბალიშზე და სხვა მსგავს რბილ ზედაპირზე. ასეთი ზედაპირი კეტავს ვენტილაციის ხვრელებს ქვემოდან და ხელს უშლის სითბოს გამოსვლას კომპიუტერიდან. ეს იწვევს სისტემის სწრაფ გადახურებას, რაც პირდაპირ კლავს ელემენტის სიცოცხლისუნარიანობას.
4. მოარიდეთ მზის პირდაპირ სხივებს
მზეზე გაჩერებისას ლეპტოპის კორპუსი ძალიან სწრაფად ხურდება, შიდა ტემპერატურა იზრდება, რაც, როგორც უკვე ვთქვით, დამღუპველია ლითიუმ-იონური აკუმულატორისთვის. ეცადეთ იმუშაოთ სიგრილეში, ჩრდილში და მაქსიმალურად მოარიდოთ მოწყობილობა მზის პირდაპირ სხივებს (განსაკუთრებით ზაფხულში მანქანაში არ დატოვოთ).
5. ზამთარში, სიცივიდან შემოსვლისას აცადეთ ადაპტაცია
ელემენტს არც ძლიერი სიცივე უყვარს. თუ ზამთარში, ქუჩაში ტემპერატურა 0-ს ქვემოთაა და ლეპტოპს დიდხანს ატარებთ გარეთ, მისი ტემპერატურაც მკვეთრად ეცემა. ოთახში (სითბოში) შემოტანისას ნუ ჩართავთ მას მაშინვე! დაელოდეთ მინიმუმ 20-30 წუთი, რათა ლეპტოპი ოთახის ტემპერატურას მოერგოს. წინააღმდეგ შემთხვევაში შიგნით შეიძლება კონდენსაცია (სინესტე) გაჩნდეს, რამაც შეიძლება მოკლე ჩართვა გამოიწვიოს.
6. სჯობს არ გამოიყენოთ „მოლოდინის რეჟიმი" ხანგრძლივად
ბევრი ადამიანი ამჯობინებს ლეპტოპის ეკრანის უბრალოდ დახურვას და მის მოლოდინის რეჟიმში (Sleep Mode) გადაყვანას. ეს მოსახერხებელია, თუმცა მისი გაკეთება მხოლოდ მაშინ არის რეკომენდებული, თუ ნოუთბუქთან დაბრუნებას მაგალითად 1-2 საათში აპირებთ. უფრო დიდი ხნით (მაგალითად მთელი ღამით) მოლოდინის რეჟიმში დატოვება ტყუილად ხარჯავს და ვნებს აკუმულატორს. ძილის წინ აუცილებლად გამორთეთ ნოუთბუქი სრულად (Shut Down).
7. გამორთეთ დამტენი დენის წყაროდან, როცა არ იყენებთ
თეორიულად, როცა თანამედროვე ელემენტი სრულად იტენება 100%-მდე, დატენვის პროცესი იბლოკება. თუმცა პრაქტიკაში, ადაპტერი მაინც აწვდის ე.წ. „კომპენსაციურ" დენს, რათა 100% შეინარჩუნოს. ეს მიკრო-დატენვები გრძელვადიან პერსპექტივაში მაინც ფიტავს ელემენტს. ამიტომ, როცა ლეპტოპს სრულად თიშავთ (მაგალითად ღამით), სჯობს დამტენიც გამორთოთ დენის წყაროდან (შტეფსელიდან).
Laptops.ge — შეამოწმეთ ჩვენი შეთავაზებები
გაეცანით სხვა საინტერესო სტატიებს Laptops.ge-ზე და შეიძინეთ მაღალი ხარისხის, შემოწმებული (Refurbished) ლეპტოპი, რომლის ელემენტიც იდეალურ მდგომარეობაშია. ჩვენთან თითოეული ლეპტოპის აკუმულატორი მკაცრ ტესტირებას გადის გაყიდვამდე!
