რა განსხვავებაა macOS-ს და Windows ოპერაციულ სისტემებს შორის და რომელი

რა განსხვავებაა macOS-ს და Windows ოპერაციულ სისტემებს შორის და რომელი ჯობია?

• 29 Sep, 23
• 0 კომენტარი

დღევანდელ ციფრულ ეპოქაში, ოპერაციული სისტემის არჩევა გადამწყვეტ როლს თამაშობს კომპიუტერულ გამოცდილებაში. ორი ყველაზე გამორჩეული კონკურენტი ამ სფეროში macOS და Windows -ია. macOS შექმნილია Apple Inc.-ის მიერ, ხოლო Windows წარმოადგენს Microsoft-ის მთავარ პროდუქტს. თითოეული ოპერაციული სისტემა გამოირჩევა თავისი უნიკალურ მახასიათებლებით, პრიორიტეტებითა და ამავდროულად, ნაკლოვანებებით.

უფრო მარტივად რომ აღვიქვათ, ყველას გვყავს მეგობარი, რომელსაც აქვს ანდროიდის ტელეფონი, ხოლო სხვას აიფონი. რაც არ უნდა გასაკვირი იყოს, სამყარო დღეს საზოგადოებას ასე ყოფს - ანდროიდის და აიფონის მომხმარებლები. ამ ორი კატეგორიის ხშირი კამათის საგანიც სწორედ შემდეგი თემაა აიფონი სჯობს, თუ ანდროიდი. სწორედ ანალოგიური სიტუაცია გვხვდება მაშინაც, როდესაც ვცდილობთ განსხვავებები, უპირატესობები და სუსტი მხარეები აღმოვუჩინოთ macOS-ს და Windows-ს. საზოგადოების ნაწილი ყველანაირად ცდილობს macOS-ის უპირატესობებს გაუსვას ხაზი, ხოლო დანარჩენი ნაწილი Windows-ის ამოუწურავ შესაძლებლობებზე ამახვილებს ყურადღებას.

ცოტაოდენი ყურადღება ლეპტოპის გარეგნულ მახასიათებლებზეც შეგვიძლია გავამახვილოთ. MacBook-ის ყველა მოდელი თითქმის არ განსხვავდება ერთმანეთისგან ვიზუალურად, ეს შეიძლება ჩავთვალოთ როგორც ბრენდინგის გამომხატველი უნიკალური შემოთავაზება. თუმცა, windows-ზე მომუშავე ლეპტოპები ბაზარზე უფრო ფართო სპექტრით არიან წარმოდგენილნი. თქვენ შეძლებთ იპოვოთ ნებისმიერი ფერისა თუ ზომის ლეპტოპებს, რომლებიც ზუსტად თქვენს კომფორტზე იქნება მორგებული.

როდესაც ვსაუბრობთ ვიზუალურ მხარეზე, არ უნდა დაგვავიწყეს ე.წ. პორტები. პორტების საშუალებით ჩვენ ლეპტოპებს ვუკავშირებთ სხვადასხვა ნივთებს, მაგალითად: ტელეფონებს, გარე მყარ დისკებს, ყურსასმენებს, HDMI კაბელებს და ა.შ. MacBook-ების ერთ-ერთი მთავარი მინუსი პორტების ნაკლებობაა. ის იდეალურად ასინქრონებს ინფორმაციის გადაცემას Apple-ის სხვა მოწყობილობებიდან, მაგრამ არა სხვა ტექნოლოგიებიდან. რაც შეეხება Windows ლეპტოპებს უფრო მეტი პორტი და მათი ტიპი აქვთ ვიდრე Mac-ებს.

ლეპტოპი, რომელსაც სენსორული ეკრანი აქვს? კარგად ჟღერს არა? ასეთი ეკრანები მხოლოდ Windows-ის ლეპტოპებს აქვთ. გასაკვირია, მაგრამ სენსორული MacBook არ არსებობს. მიუხედავად იმისა, რომ არსებობს ჭორები, რომ Apple მუშაობს სენსორულ MacBook-ზე, კომპანიამ ეს ინფორმაცია არც დაადასტურა და არც უარყო. რაც იმას ნიშნავს, რომ ჯერ-ჯერობით არ ანონსდება ასეთი სახის MacBook-ის წარმოება, ამის საპირისპიროდ, ბაზარზე უკვე რამდენიმე შესანიშნავი სენსორული ლეპტოპია მოცემული.

Laptops.ge-ს მიზანია დეტალურად განვიხილოთ ორივე ოპერაციული სისტემა და დაგეხმაროთ თავად შეძლოთ დადგენა, რომელი სისტემა დააკმაყოფილებს თქვენს საჭიროებებსა თუ სურვილებს.

1. ინტერფეისი და სიმარტივე

macOS ოპერაციული სისტემა გამოირჩევა ელეგანტური, დახვეწილი და მინიმალისტური დიზაინით, რომელზეც Apple დიდი ხნის განმავლობაში მუშაობდა და მუდმივად აუმჯობესებდა. macOS ოპერაციული სისტემის ინტერფეისი ინტუიციურია - სწორედ ამიტომ იმ ადამიანებს, რომლებიც მუშაობას პირდაპირ ამ სისტემაზე იწყებენ, არ უჭირთ ნავიგაცია. მაგრამ, Windows-ის ოპერაციული სისტემა იმდენად მარტივია, რომ მასზე მუშაობა არ უჭირს არც ერთი ასაკის ადამიანს. მისი ინტუიციური და მრავალფუნქციური შესაძლებლობები იდეალურია როგორც ბავშვებისთვის, ისე საოფისე საქმიანობისთვის, თამაშებისთვისა და ნებისმიერი სხვა საკითხისთვის. Windows- ის ოპერაციული პროგრამის მომხმარებლები მუდმივად განიცდიან დისკომფორტს, როდესაც მათ უწევთ მუშაობა macOS-ზე. ეს ადასტურებს იმ ფაქტს, რომ Windows-ის ინტერფეისი ბევრად უფრო მარტივად გამოსაყენებელია.

2. ოპერაციული სისტემისა და პროგრამული უზრუნველყოფის თავსებადობა

ერთ-ერთი ყველაზე მნიშვნელოვანი ფაქტორი ოპერაციული სისტემის არჩევისას არის პროგრამული უზრუნველყოფის თავსებადობა. macOS უპირველეს ყოვლისა მხარს უჭერს აპლიკაციებს, რომლებიც ხელმისაწვდომია Apple App Store-ში ან მათ, რომლებიც აშკარად შემუშავებულია macOS-ისთვის. მიუხედავად იმისა, რომ ხელმისაწვდომი აპლიკაციების რაოდენობა დროთა განმავლობაში გაიზარდა, არჩევანი შესაძლოა მაინც შეზღუდული იყოს Windows-თან შედარებით.

Windows, როგორც მსოფლიოში ყველაზე ფართოდ გამოყენებული ოპერაციული სისტემა, გთავაზობთ პროგრამული უზრუნველყოფის ვარიანტების ფართო სპექტრს. პროდუქტიულობის ხელსაწყოებიდან კრეატიულ კომპლექტებამდე, Windows-ის მომხმარებლები სარგებლობენ უფრო ფართო პროგრამული ბიბლიოთეკით. მაშასადამე ამ კომპონენტში Windows ნამდვილად უპირატესობაშია კონკურენტთან შედარებით.

3. აპარატურასთან (Hardware) ინტეგრაცია

როგორც უკვე აღინიშნა, macOS ექსკლუზიურად შექმნილია Apple-ის აპარატურისთვის, რაც უზრუნველყოფს უწყვეტი ინტეგრაციისა და ოპტიმიზაციის საშუალებას სხვა კვლავ Apple- ის პროდუქციასთან. ეს მიდგომა უზრუნველყოფს თანმიმდევრულ მომხმარებლის გამოცდილებას Apple-ის ყველა მოწყობილობისთვის. თუ უკვე ფლობთ Apple-ის პროდუქტს, როგორიცაა iPhone ან iPad, macOS-თან ინტეგრაცია თქვენთვის კიდევ უფრო გამარტივდება და ამ მოწყობილობების ერთმანეთთან დაკავშირებაც არ გაგიჭირდებათ. 

რაც შეეხება Windows ოპერაციულ სისტემას, ის თავსებადია ტექნიკის მწარმოებლების ფართო სპექტრთან. მიუხედავად იმისა, რომ ეს მომხმარებლებს სთავაზობს მოწყობილობების მრავალფეროვან არჩევანს, Windows-სა და სხვა ტექნიკას შორის ინტეგრაცია შეიძლება ყოველთვის არ იყოს ისეთივე შეუფერხებელი, როგორც macOS-ის Apple-ის აპარატურასთან. ეს იმიტომ, რომ Apple-მა შექმნა საკუთარი ეკოსისტემა, რომლის საშუალებითაც მისი ყველა გაჯეტი ერთმანეთს იდეალურად ერწყმის და ინფორმაციის გაცვლას აადვილებს.

4. უსაფრთხოება

MacOS უფრო უსაფრთხო ოპერაციულ სისტემად შეიძლება ჩაითვალოს, რადგან ის დაფუძნებულია UNIX არქიტექტურაზე. ასევე, აპლიკაციების განახლებისას App Store მკაცრ პროცესებს აწესებს, რათა მაქსიმალურად უზრუნველყოს MacOS-ის უსაფრთხოება. თუმცა, macOS პოპულარობის გამო, ის უფრო და უფრო ხშირად ხდება კიბერშეტევების სამიზნე. ამის გამო Apple მუდმივად ცდილობს განაახლოს უსაფრთხოების პოლიტიკა.

აღსანიშნავია, რომ Windows, როგორც ყველაზე ფართოდ გამოყენებული ოპერაციული სისტემა, თავისთავად განიცდის კიბერშეტევების დიდ რიცხვს. თუმცა, Microsoft-მა მნიშვნელოვანი ინვესტიცია ჩადო იმისათვის, რომ Windows-ის უსაფრთხოება გაეძლიერებინა და Windows Defender-ის დანერგვით, უსაფრთხოების ხშირი განახლებით, ოპერაციული სისტემა ბევრად უფრო ძლიერი გახდა.

გაეცანით ჩვენს სტატიას უსაფრთხოებასთან დაკავშირებით: როგორ დავიცვათ კომპიუტერი ან ლეპტოპი ვირუსებისგან?

5. ინდივიდუალური მორგება

Windows გამოირჩევა პერსონალიზაციისა და მოქნილობის მაღალი დონით. მომხმარებლებს შეუძლიათ თავიანთი დესკტოპის პერსონალიზაცია სხვადასხვა სახით. მაშასადამე, Windows აფასებს მომხმარებლის ინდივიდუალურობას და მაქსიმალურად ცდილობს თითოეულ ადამიანს შეუქმნას თავისუფალი სივრცე. მომხმარებელს შეუძლია თავისი საჭიროებებისა და ინტერესებიდან გამომდინარე შექმნას მასზე სრულყოფილად მორგებული უნიკალური სისტემის ინტერფეისი.

macOS, მიუხედავად იმისა, რომ გვთავაზობთ პერსონალიზაციის ხარისხს, მეტად ორიენტირებულია Apple-ის ყველა მოწყობილობაში თანმიმდევრული და გამართული გამოცდილების უზრუნველყოფაზე. სწორედ ამიტომ, macOS ინდივიდუალური მოქნილობის დონე უფრო შეზღუდული აქვს, ვიდრე Windows-ს.

6. თამაშები და გეიმინგი

რაც შეეხება თამაშებს, თუ თქვენ გეიმინგისთვის გსურთ ლეპტოპი, მაშინ Windows-ის ოპერაციული სისტემა შეიძლება უკონკურენტოდაც კი ჩავთვალოთ. ის დიდი ხანია არის სასურველი პლატფორმა თამაშებისა და გრაფიკული დრაივერების ფართო მხარდაჭერის გამო. იმის გამო, რომ Windows უკეთეს ოპტიმიზაციას უწევს თამაშებს, სწორედ ამიტომ Game დეველოპერებიც ამ ოპერაციული სისტემისთვის უფრო ხშირად ქმნიან პროდუქტებს, ვიდრე macOS-ისთვის. 

მიუხედავად იმისა, რომ Apple ცდილობს გააუმჯობესოს ეს ნაკლი და შეძლოს მისი ოპერაციული სისტემა მოარგოს თამაშებს, Windows მაინც რჩება გეიმერების საყვარელ არჩევანად, განსაკუთრებით კი მათთვის, ვისაც უახლესი თამაშების თამაში სურთ.

შერჩევის ერთ-ერთი მთავარი კრიტერიუმი, რაღა თქმა უნდა, ფასია. macOS სისტემაზე მომუშავე ლეპტოპები ბაზარზე შედარებით მაღალი ფასით არის ცნობილი, ამიტომ ყველას არ აქვს საშუალება შეიძინოს ის. რაც შეეხება Windows, რადგან ის უფრო ფართო ბაზარს ფლობს, შესაბამისად მომხმარებელს შეუძლია ნებისმიერი საბაზრო ღირებულების ლეპტოპი შეარჩიოს. მაშასადამე, Windows აქვთ უფრო ფართო ფასების დიაპაზონი.

როგორც ფასი, ასევე საჭიროა ლეპტოპის შერჩევისას გაითვალისწინოთ შეკეთების საკითხიც. მარტივად შეგიძლიათ იპოვოთ ისეთი ადგილი, სადაც დაზიანებულ Windows ლეპტოპს შეაკეთებენ, მაგრამ MacBook-ის შეკეთება ბევრად უფრო რთულია. ხშირად როდესაც შესაკეთებელია MacBook პრობლემის გადაჭრა შეუძლიათ მარალკვალიფიცირებულ პროფესიონალებს, სერვის ცენტრებს ან კონკრეტულ კომპანიებს.

მაშასადამე, არჩევანი macOS-სა და Windows-ს შორის საბოლოოდ დამოკიდებულია თქვენს ინდივიდუალურ საჭიროებებზე და პრეფერენციებზე. macOS გამოირჩევა დიზაინით, Apple-ის აპარატურასთან ინტეგრირებით და მომხმარებლის გამოცდილებით, რაც მას მიმზიდველ ვარიანტად აქცევს კრეატიული პროფესიონალებისთვის და მათთვის, ვინც უკვე ჩართულია Apple-ის ეკოსისტემაში.

მეორეს მხრივ, Windows გთავაზობთ შეუდარებელ პროგრამულ თავსებადობას, პერსონალიზაციის ვარიანტებს და თამაშების მხარდაჭერას. ამავდროულად, ის მარტივია ყველა ადამიანისთვის.

გადაწყვეტილების მიღებამდე გაითვალისწინეთ თქვენი პრიორიტეტები, როგორიცაა პროგრამული უზრუნველყოფის მოთხოვნები, აპარატურის თავსებადობა, უსაფრთხოება და სათამაშო პრეფერენციები. ორივე ოპერაციულ სისტემას აქვს თავისი ძლიერი და სუსტი მხარეები და "უკეთესი" არჩევანი დამოკიდებულია იმაზე, თუ რომელი ასპექტები უფრო მჭიდროდ შეესაბამება თქვენს საჭიროებებს.